Home Minister hnena a thu ziak a ngai angin Zoram Today ah hian dah lan a ni.

(Letter to Home Minister, Govt. of Mizoram: Subject: Raltlan (Refugees) chungchanga hmala tura ngenna leh Supreme Court thu pek anga Mizoram State Police Accountability Commission (MISPAC) function tir thuai tura ngenna.

Sir,

Ni 11.March.2025 khan Raltlan chungchangah Union Home Minister hnenah Governor kal tlangin lehkha ka lo theh lut tawh a,Union Home Secretary bakah Mizoram Home Secretary te chu ka lo pe tel tawh bawk a. Ratlan (refugees), Illegal Immigrants avangin khawvel ram thenkhat chuan harsatna lian tak an hmachhawn mek a. Keini Mizoram ngei pawh  kan chhehvel rambuai avangin kan unaute kan ramah an rawn tlan lut a. United Nation (UN) Refugee Convention 1951 & 1967 Refugee Protocol ah India chu signatory a nih loh bakah Ministry of Home Affair chuan abikin Myanmar atanga raltlan NE State a lo lutte chu India sawrkarin a pawm theih loh thu leh ramri uluk taka veng tha tura hriattir kan nih laiin, kan unaute harsatna tawh hrethiamin Mizoram sawrkar, NGO leh mipui pawhin kan phak tawka lo tuamhlawmin, kan unau Myanmar,Bangladesh,Manipur atanga raltlan a lo lut harsatna tawkte hrethiam takin kan lo kuang kuah a.

Mizoram hi State ralmuang leh zalen kan inti thin a, heng changchawi hian kan zalenna kan hman sualtheih avangin, chung thleng thei laka min veng turin dan siam a ni a. Law & Order kenkawh leh ram mipuite himna pek hi State Sawrkar mawhphurhna a ni. Tunlai Social Media ah kan unau raltlante laka thikthu pek chhiatna leh heng raltlan kan lo dawn sawnna kawnga dik tawk lo thil awm thei ni a alan avangin Mipui phun thawm a lian hle a. He thil hi unau karah harsatna lian zawk thlen thei a nih avangin, a hnuaia rawtna ka rawn thlen te hi rang taka Mizoram Home Department in ngaipawimawha hma min lak sak turin ka ngen a che.

1. Sawrkarin Raltlan dan hnuaiah khuahkhirh rawhse: Tun dinhmunah sawrkarin a chhiar theih chinah raltlan 41355 vel Mizoramah an awm mek niin alanga. Mizoram a raltlan zat sawi dik a har thu leh hmun thenkhatah awlsam taka luh theihna a awm avanga raltlan zat danglam thei leh Mizoramah raltlan te leh sumdawng te nen lut an inpawlh avangin an zat hriat ahar thu chu Assembly house ah i sawi a. Kan unaute harsatna tawk rawn lut zingah remchanna zawnga dan phalloh hmanga sum dawnna khawih an awm thin niin alang bawk a.

 Mizoram sawrkarin raltlan Status a pek zingah, duh duh huna Mizoram lut leh chhuak thinte hi Illegal Immigrants angin sawrkar hian a en nge, raltlan status a pe vek zawk tihhi mipui zawhna a ni a, hei hi Mizoram sawrkar pawh a dinna ti chiang turin ka ngen a, duh duh huna Mizoram lut leh chhuak theia raltlan leh kan ramri kan dah zalenna hian nghawng thalo zawk a neih mek avang leh tun aia nasa zawk kan zawh loh tur buaina kan insiam theih avangin dan hnuaiah raltlan khuahkhirh vat turin leh sawrkarin raltlan status a pek leh chhinchhiah nilo, duh duh huna Mizoram lut leh chhuak thinte chu dan anga an chungah action lak anih theih nan leh ramri venhim kawngah khauh leh fimkhur zawka hmala turin ka ngen a che.

2. Raltlante sumdawnna dan hnuaiah kalpui turin: Ram dan ding lai leh kalphung (The Mizoram Trade Articles, (Licensing and Control) Order,13th Nov, 1987, The Mizoram Market (Regulation and Facilitation)Act, The Mizoram Shops & Establishment Act, The Mizoram Street Vendor (Protection of Livelihood & Regulation of Street Vending)Act, The Foregners Act, 1946 etc. nei kan ni a. Dan in a phut ang tilo leh sawrkar hriatpuina tello a sumdawnna kalpui leh document lem hmanga sumdawn theihna tura hmalak hi dan bawhchhiatna leh ram dan ding lai zahlohna a ni a. He tiang thil ti hi raltlan mai bakah hnam dang mi, sumdawnna kalpui ṭhin mipuiah sawi thawm a  nasat em avangin, heng thil ti an awm loh nan sawrkar hian tun aia khauh zawk leh fimkhur zawka sumdawnna kawngah raltlante a khuahkhirh a tul tak zet a.

 Kan unau raltlan ten hna an thawhna leh ei bar an zawnna kawngah sawrkar hriatpuina hnuaia dan ang taka an tih theihnan sawrkar pawhin ruahmanna tha zawk siam sak turin ka ngen che a. Heng bakah hian sumdawnna atana ramhnuaia ei theih thlai leh thei, thil zik leh tuai lam(rua/mau tuai) chi hrang hrang (Environmental resources) an lak chhuah dan chungchangah pawh, zirtirna pek an mamawh tak zet a, hei hi kan environment nghawng thei a nih avangin hemi chungchangah pawh hian khuahkhirhna engemaw chen kalpui turin ka ngen bawk a che.

3. Raltlante Lirthei khalh chungchang: Mizorama Raltlan rawn lut zingah Driving License nei or siam an awm thei niin alanga, dan ang thlapa India/Mizoram rawn lut, dan hnuaia lirthei khalh phalna International Driving Permit (IDP) License neilo lirthei khalh an tam hle niin a hriat bawk, hei pawhhi dan anga kalpui tur leh khuah khirha, dan phalloh thil ti tute chunga action lak a nih theih nana hmala turin ka ngen bawk a che.

4. Raltlan ram lei chungchangah:  Mizorama ram nei thei Mizorama cheng nghet, an chhungte January 26, 1950 hma lama Mizorama cheng tawh emaw, India ram President-in Constitution Article 342 (I) hnuaia Mizoram  State tan bik schedule tribes-a a puan te an ni a. Sawrkarin phalna a pe hmasa a nih loh chuan tribal nilo hnenah ram lei tir/hlan phal a nilo .(The Mizoram Land Revenue Act,2013). Hun eng emaw ti kal ta aṭang khan Mizoram pâwn leh chhunga awm Mizorama inhmun lo ram lei thei kan sawi ang nilo ten, Aizawl leh khawdang ṭhenkhatah in leh in hmun lo ram sum tam taka lei sawi tur an awm ṭhin a. 

A ngam huai huai hnêna ram lei tîr zel mai hi kan ram leh hnam tan a pawi thei a, Mizoram khua leh tui dik tak an ni em tih leh danin phalna a pek nilo ram leitu leh hralhtu chhui zuina kawngah tunaia khauh zawka kalpui tur leh raltlan leh hnam dang danin phalna a pek nilo ten ram an neih theihna tur kawnga hriatpuina lo pe chhuaktu te thlenga hremna pek an nih theihna tur leh raltlan thenkhat inhmun lo ram nei/lei te dapchhuah kawnga nasa zawka hmala turin ka ngen a che. Heng bakah hian Mizoram chhunga chibil inthliar theihna awm thei zawnga In (building) sak ang chi zawng zawng pawh dap chhuaka, dan anga hmala thuai turin ka ngen che a ni.

5. Raltlan Document lem siam lo tura kuahkhirh: Secretary(Border Management),Ministry of Home Affairs,Govt.of India Chairmanship na hnuaia, Dt.21st .01.2025 meeting thurelin, Myanmar leh Bangladesh ramte buai avanga Mizoram chhunga raltlan lo lutte leh ramdang mite chu, heng India khua leh tui kan nihna lantirna tura lehkha, Voters ID, Aadhar Card, Birth Certificate,Tribal Certificate, Residential Certificate etc. te hi an neih ve a rem tilo a. Khing a chunga kan sawi point hrang hrang te khi heng document hmanga neih tum leh a lem siam tir an awm fo thin. Heng document lem hmanga Mizoram sawrkar MPSC hnaruak thlenga hna dil nana hmang an awm loh nana, fake document siam tir leh a siam sak thin tute bakah hriatpuina lehkha (recommendation letter) lo pe thin thlenga, hremna pe tur leh tun aia fimkhur leh khauh zawka hmala turin ka ngen a che.

Heng Raltlan chungchanga rawtna hrang hrang ka rawn thlen te hi, tun hnaia Mizoram mipui leh kan unaute raltlan rawn lutte inkara in hmuh thiam lohna thlen thei thil a thlen bakah, zanreia khawlaia hriam lek chunga vak thin an awm ni ten a hriata, Lawless Society/City kan nih loh nan NGO chauha innnghatlo a, Enforcement te thuam chak tur leh tun aia chhun leh zan Police patrolling pawh khawng zawka kal pui a,Emergency Vehicle Police Station a pakhat chauh an kawl te hi thuam chakturin leh heng kawnga hmalakhi sawrkar mawhphurhna a nih ang ngeia min ngaihpawimawh sak turin ka ngen che a ni.

Hon’ble Supreme Court of India in Writ petition (Civil) No.310 of 1996 thuchhuah asiam angin Mizoram State Government Gazette Notification No.C.18018/18/2022,the 22nd of May, 2023 chuan  Mizoram Police  Accountability Commission a din a. He mi chungchangah hian Ni 5th of March, 2024 ah Mizoram Home Deparment chuan State Level Police Complaints Authority, Chairperson leh Member te leh District Level Police Complaints Authorities (Nothern Range, Southern Range leh Eastern Range) Chairperson leh Member te ruat an ni a. (vide Home Department Notification No.C.18018/18/2022-HM dt. 05.03.2024)

Heng Mizoram Police Accountability Commission, Chairperson leh Member (State Level Police Complaints Authority ) ruatte hian, Ni 12th July, 2024 khan Secretary to the Govt.of Mizoram Home Department-ah an mamawh hrang hrang “Office accommodation for Mizoram Police Accountability Commission” ziakin an theh lut a. RTI chhanna ah Mizoram Police Accountability Commission, Chairperson leh Member (State Level Police Complaints Authority ) ten an mamawh hrang hrang an thehluhna official in document Home Secretary ah dawn a nih loh thu a chhan ka ni.  (RTI.No.F.12017/1/2024-HMP/32,Govt.of Mizoram,Home Department).

He tiang Mizoram mipui tana pawimawh lutuk hi, tun thlenga Mizoram sawrkar abikin Home Department in a ngaipawimawh lo hi Mizoram mipui zah lohna leh Supreme Court of India zah lohna lian tak a ni a. Mipuiin Mizoram Police a harsatna an thlen (public complaints) chungchangah mipui lungawi lo te zualko na tur ber, he tianga office leh staff an mamawh dan an thlen hnu pawh a function tir loh leh Mizoram State Government Gazette Notification No.C.18018/18/2022, the 22nd of May, 2023-in thuneihna a pek ang pawh hmang theilo  a siam hi, mipui zah lohna leh supreme court thuchhuak pawisaklohna lian tak a nih avangin arang thei ang bera Mizoram Police Accountability Commission hi an function theih nana hmala thuai turin ka ngen che a, mipuiin Mizoram Police a an harsatna tawh eng case pawh ni rawhse, Police lamin hma an lak sakna kawngah an lungawi tawk lo a nih chuan Mizoram Police Accountability Commission hi zualko theihna a ni tih Mizoram mipuiin an hriat theih nana mipui hmaa puangzar (Awareness) turin ka ngen bawk a che, tiin VL Thlamuanpuia hian a ziak a ni.